L'obu di pascha
In tutti li nogozzi, in tutti li vidrini,
d'obi di ciccuratti tu ni vedi a duzzini;
vi n'è manni e minuddi, vi n'è pa dugna gusthu
ma dummanda lu presgiu... già ni pigli l'assusthu!
E pròbadi a attasthallu: ranzigu che lu feri!
A zi lu poni a un'ara e mi fai lu piazzeri!
Si mi dì ch'è già ti doggu rasgioni,
debbì d'assè pà chissu chi ni veggu a muntoni.
No pari chi sia Pascha si no rigari l'obu
ma parò chi piccaddu chi nò lu pigli a probu!
'abri a vidè la cosa che zi ponini drentu
e tandu pà lu crebbu ti n'ischappa lu pientu.
Cand'era monoredda giaia zi lu fazia
lu cozzuru di l'obu e sobra zi scheibia
l'innommu pà dugnunu; lu cozzuru bicchiaddu
già era una biddezia, mi parìa ricramaddu.
Segundu lu carori di lu forru era zerthu
chi niscìa troppu cottu, isgiabidu o indigesthu.
Ma nò zi n'impurthaba, lu magnabami freddu
e liggendi l'innommu dizìami - Cant'è beddu! -
E tandu, o ciccurati o nudda, acchì è la moda.
Cagliaddi prima chi ti ni faria la coda,
isciubbareggiaddiru, sia cumenti si sia, vogliu chi chistha Pascha la passia in alligria.
POESIA SASSARESE (1966)
Nessun commento:
Posta un commento