UNA TRISTHI VIRIDDAI
Vi isthoggu mari ugna sera
e pensu acciaraddu abbaiddendi lu zeru,
un nodu si femma in cori,
fárani torra dui lágrimi e dori.
Si è ischrittu i lu disthinu
chi chissa dì Deu vi vuria vizinu,
eddu m’ha d’aischulthà.
Ma v’è ancora lu carori,
seddi voi dui abbrazzaddi cun amori,
nudda è più cumente sempri,
rimani un bioddu e milli sintimenti
chi porthu drentu a me…
Abà chi seddi vizinu, in mezzu a tutti li più beddi
isthelli chi vi so i lu zeru, di videvi sognu sempri,
di turravi ad abbrazzà pa pudemmi d’aggiuddà
e in chistha vidda cuntinuà.
In brazzu a Deu seddi drummendi, mamma, babbu e li fradeddi,
víbini di voi l’ammenti, di li mamenti più beddi.
Lu cori no sana mai da una tristhi viriddai
chi no azzettarani mai…
Vi isthoggu mari isthasera,
isthrignu forthi i li mani un durori,
dui parauri in un pabbiru ischribu
di voi pa pinsavvi vizinu.
Vint’anni, dui beddi fiori
i la vidda e in zeru liaddi d’amori
e abà ancora di più…
Abà chi seddi vizinu, in mezzu a tutti li più beddi
isthelli chi vi so i lu zeru, di videvi sognu sempri,
di turravi ad abbrazzà pa pudemmi d’aggiuddà
e in chistha vidda cuntinuà.
In brazzu a Deu seddi drummendi, mamma, babbu e li fradeddi,
vibini di voi l’ammenti, di li mamenti più beddi.
Lu cori no sana mai da una tristhi viriddai
chi no azzettarani mai…
Brano dedicato ad Alessandro Solinas e Claudia Nali
Nessun commento:
Posta un commento