Ginetto Ruzzetta

OGGI  E  ALLORA


So giunti l'anni di vibí d'ammenti
chi Sássari d'allora é abá prisenti
si andabi a lu bindioru di Sannia
ti raccuntaba lu chi suzidia

Piazza D'Italia era di li signori
saluto al Duce a noi in camicia nera
e l'usthurani cu li zappadori
l'appuntamentu in Portha Sant'Antoni

Piazza Tola abá si pó ammintá
tutti in fira lu pani a cumpará
lu siri ,la sardhina e lu zarrettu
era l'aunzu di lu povarettu

Portha Noba giogga mezu riál
la pirandra di via universitá
la cionfra chi fazia Pemperempé
Troiani , Gravincella e Trapadé

Santu Dunaddu e Santa Purinari
a ischora senza libri in cirinella
lu tabacchinu di Giannetta Pidocciu
un cittu di carrubba o caramella

Pusadda a cosci a foggu i lu brasgeri
ma a me mi dori contani li fori
caschunu pa la fammi fazi un súlthu
e chissu chi si teccia a fába arrusthu

Oggi e allora no poi paraguná
e li buffi li poi moltiplicá
triglia e ariostha ti la poi magná
si hai un trabagliu e ti sai arangiá

La prisgioni é piena giá si sá
tutti fora in semilibertá
ca trufa zentinaria di mirioni
ha dui o tre mesi apena di prisgioni