Tino Grindi
La gobbura di Piazza d’Itaria
Eh! Chi mannu abburottu*
pari sia turraddu lu quarantottu,
pa lu prugettu di Piazza d’Itaria
é ischuppiadda la mararia,
tutt’assulthaddi pa lu pavimentu,
l’architetti v’hani posthu appentu*
a disignà la piazza noba,
ma candu l’hani postha a la proba
li sassaresi hani prutisthaddu umbè:
mi chi panchini no vi n’è!
E cos’è chisthu granitu rosa?
Mi chi no semmu a Bosa!
E chisthi zattari cosa so?
Parimmu giugghendi a mabò;*
ajò a femmu un poggu li seri,
già semmu sassaresi matruferi,
ma abà, mi pari chi semmu esagirendi,
si i lu mondu é tuttu ciambendi,
noi vurimmu la Piazza cument’era
candu passiggiabami manzanu e sera,
a drestha li ricchi cu li masciottoni
a sinisthra li ziracchi cu li militari a plotoni
era tutt’un’althra megliu cosa
candu arribìa Margharita e Rosa
dui tronchi di pizzinni avveru
vi lu digg’eu chi soggu sinzeru.
La viriddai é chi li mattoni d’abà,
sò brutti e fazini puru lisciggà
e allora cosa dizi Masthr’Antoni:
parabà ciambemmu li mattoni
dabboi pinsemmu a la barandiglia*
attinzioni a li curombi in squadriglia
candu bumbardheggiani sò trimendi
e dabboi pianu pianu cuntinuendi,
accunzemmu li dui funtani
chena abè secchi li mani,
pa lu munumentu di lu Re,
candu torr’a vidda Trappadè
li femmu di maimaru un cabaddu
e intondu un giardhinu tuttu sarraddu.
Cussì vurimmu la Piazza nosthra
chi no sia isciumpiadda nè mortha,
zi dipiazi pa lu sobrintendenti,
ma ha dittu umbè di jenti
chi li tubi di li luzi a siruru
si li ponghia tutti ganti in… giardhinu,
a lu Sindagu Assessori e Giunta
ni l’abemmu sigaddu la punta
a li dizottu architetti cu lu cabbizzoni
ni l’abemmu ischunzaddu li forri boni.
Chissà candu sarà finidda
chistha isthoria già iviridda,
parabà zi tinimmu lu Klinkeraddu
aisittendi un miraguru da lu zeru...faraddu.
Boni festhi cun saruddu a tutti ganti
e isciddazzi a l’annu nobu a ipanti!*
Nessun commento:
Posta un commento